Loluwari Média (Lautém) – xefe suku Serelau, Denojio Soares, informa, joven na’in 3 husi Suku Serelau halo problema hasoru membru Forsa Defeza Timor-Leste (F-FDTL) Komponente Naval ho naran Vigario Imanuel de Souza iha 02 Novembru 2023 iha daerah Buihomau.
“Ita nia membru F-FDTL husi komponente Navál ne’e ho nia espoza halo viajen husi Baucau atu ba Lospalos vila mak ita nia joven na’in 3 ho kondisaun lanu todan hapara membru F-FDTL refere hodi hamosu problema ou kuinese sala hasoru membru F-FDTL.” dehan xefe Suku Serelau Denojio Soares, iha suku Serelau kampung Buihomau, Domingu (05/11).
Autoridade lokal ne’e haktu’ir problema nia hun ne’e joven husi suku Serelau kampung Buihomau iha Finadu joven na’in tolu ne’e hemu tua lanu iha rate hafoin fila mai uma hodi hapara membru F-FDTL ne’e hodi ameasa maibé anggota F-FDTL ho nia espoza hatan la’os ema problema na’in maibé no foin mai husi Baucau atu ba uma Lospalos.
“Ita nia membru F-FDTL ne’e nunka halo problema ruma hasoru joven sira iha tempu pasadu ate momentu ida ne’e no laiha ligasaun ho problema saida de’it maibé tanba joven na’in 3 ho kondisaun lanu todan no kunese sala hodi hapara nia motor tanba ne’e mak membru F-FDTL ne’e telefone ba polísia eskuadra Lautém to’o kedas iha fatin akontesimentu hodi asegura joven na’in tolu ba eskuadra hodi halo proses investigasi.”
“Ami hatene no rekunese an katak problema refere ne’e totalmente alin joven na’in 3 ne’e mak sala no ita nia membru F-FDTL ne’e la halo asaun ruma hasoru maibé ses an de’it no nia rasik la sala .”
Tanba rekunese sala, ami autoridade lokal entrega ona joven na’in 3 ba komandu Polísia Nasionál Timor-Leste (PNTL) munisipiu Lautem hodi submete ba investigasaun.
“Ami husu deskulpa no husu perdaun ba Instituisaun Falintil F-FDTL husu deskulpa no perdaun ba Aman Veterano Aswain sira ne’ebé lidera instituisaun F-FDTL.”
“Ami nia obrigadu wain ba aman no maun sira ne’ebé lidera Instituisaun Militar ne’e maske ami sala maibé nafatin tau matan ba ami ho domin no responsabilidade ho nune’e atuasaun militar mai iha fatin laiha agresaun ruma no laiha presaun ba ami, Ami promete katak ami sei esforsu makaas hodi evita hahalok di labele repete tan iha loron seluk. Obrigadu barak.”
Jurnalista : Chay Risky
Penyunting : Loluwari
