Loluwari Média (Díli) – Ministru Komercio Industria (MCI), Filipus Nino Pereira, kinta feira ne’e hala’o vizita ba AHHA Printing Ameta Hiana Haubada iha Villa-Verde Díli, nu’udar atividade negosiu ne’ebé inspira no enkoraja joven emprezarios sira iha rai laran.
“Vizita ida ne’e mai iha kompaña Timor-oan ne’ebé mak halo atividade ekonomiku, buat lubuk ida, atu dehan negosiu ne’ebé mak bele fo inspirasaun ba ita ninia joven sira, empregador sira halibur malu, sira hari’i kompaña ida ne’e depois halo negosiu iha tinan barak nia laran hahu husi zero ho sakrifisu ho badinas ho matenek ne’ebé mak sira iha ida ne’e hamosu orgullu ida tanba ne’e mak ha’u hola inisiativa atu bele mai vizita, vizita ida ne’e atu enkoraza tan ita nia joven emprezarios sira hanesan ne’e para atu hatudu nafatin sira ninia komitmentu para atu suporta mos programa governu nian, ita ko’alia kona-ba dezenvolvimentu ekonomiku, diversifika ekonomia, kriasaun empregu ninia implementasaun mak hanesan ne’e”, dehan ministru comercio industria, Filipus Nino Pereira ba jornalista sira iha Villa-Verde Kinta, (30/04).
Governante ne’e afirma, hakarak promove espiritu emprendorizmu nune’e joven sira sai autor prinsipal ba dezenvolvimentu ekonómiku iha rai laran.
“Hanesan Ministru Comerciu Industria ita hakarak promove nafatin espiritu emprendorizmu katak ita nia joven sira mak tenke sai autor prinsipal ba dezenvolvimentu ekonomiku katak ita la’os ko’alia de’it teoriamente maibé pratikamente mos ita nia joven sira hatudu espiritu emprendorizmu para kontinua kontribui ba dezenvolvimentu ekonomia i dudu kresimentu ekonomia para ita bele sai husi ki’ak no mukit”, Nino hatete.
Daudaun ne’e ministeriu dezenvolve hela make and Timor-Leste hanesan plataforma ida ne’ebé MCI kria atu fo opurtunidade no espasu ba joven sira atu halo promosaun ba produtu iha online.
“Ministeriu mos agora dezenvolve hela make and Timor-Leste ne’e plataforma ida ne’ebé mak ministeriu Komersiu industria kria para atu bele fo opurtunidade, no espasu promosaun ba ita nia joven emprendedor sira ne’e para demonstra sira nia produtu tau iha online para la’os asesu de’it iha rai laran maibé iha rai liur mos bele haree katak iha produtu lubuk ida ita produz ona iha rai laran.” Ezekutivu ne’e haktu’ir.
Koodenador projetu no Marketing AHHA Printing, Ronaldo de Araujo Fatima, agradese ba MCI nia vizita ba AHHA Printing, durante ne’e kompaña simu kliente barak hahu husi dezenu to’o produsaun.
“Hanesan empreza timor-oan nian na’in puro timor-oan 100% ami repzentante kompaña Ameta Hiana Haubada Unipessoal Lda, ne’ebé koñesidu AHHA Printing agradese tebes ba sua exelensia nia biban husik ona tempu hodi mai vizita haree direita ami nia produsaun sira hahu husi primeiru ami simu klinte ba iha dezain pois to’o iha halo produsaun no mós iha finishing”,
Ronaldo Esplika, atividade barak mak AHHA Printing iha hala’o durante ne’e, online shop, digital printing, produsaun banner, konvite, halo marmer, plaka, papan nama no seluk tan.
“Ami iha atividade ami iha area lubuk ida ne’e mak hanesan ohin ita haree iha oin online shop, ami iha online shop depois iha digital printing ninian hanesan halo produsaun ba banner, ba konvite, ba marmer, plaka papan nama sira depois ami mos halai ba area tekstil produsaun ba ropa, kamiza PDL, PDH ba iha ropa sira eskola depois halo produsaun mos ba jas no sei barak tan depois ami mos la’os iha ne’e de’it ami mos suplay hanesan R suplay sasan ba iha instituisaun governu sira hanesan suplay makina ba iha instituisaun SENAI Becora ba instituisaun sira seluk ami suplay makina suku, sasan ekipamentu saude nian nomós komputador no ami mos fo aluga motor, ami iha motor Beat, Verza, KLX no CRF ami fo aluga ho presu hahu husi 24 oras hahu 20 dolar ba to’o iha 33 dolar depende ba motor.” Ronaldo afirma.
“Ami agradese husi vizita ida ne’e no husu ba instituisaun governu ou maluk timor-oan sira karik atu halo produsaun ruma ou ba sasan ruma bele mai iha ami nia fatin atu nune’e bele suporta ami atu mellora liu tan ita nia ekonomia rai laran nomós promove liu tan tekniku timor-oan no produtu timor nian sai diak liu tan.”
Daudaun ne’e AHHA fo ona empregu ba timor-oan hamutuk ema na’in 39 kompostu husi tekniku, operador makina, tekstil no online shop.
“Ami nia staff ativu iha ne’e agora daudauk iha 39 pessoas hahu husi tekniku sira operador makina hahu husi tekstil, online shop iha deliver hamutuk 39 pessoas la konta ho sira ne’ebé freelance hahu hanesan resaler ba ami nia sasan produtu online sira nune’e ami kuaze ho sira hamutuk 180 resin maioria estudante”.
Jornalista : Nono
Editor : Loluwari
