SEFOPE Husu Traballador Husik Pasta Artemarsiais Molok Ba Servisu Iha Korea
Loluwari Média (Díli) – Xefe Gabinete Sekretaria Estadu Formasaun Profisional no Empregu (SEFOPE), Jacinto Ribeiro Dias, husu traballador timor-oan sira ne’ebé tempu besik sei ba servisu iha Korea du Sul atu husik pasta artemasiais iha Timor.
“Ita Timor-Leste sempre lori ita nia pasta, pasta pessoal ne’e mak ita nia organizasaun artemarsiais, favor rai hela imi nia pasta ida ne’e iha Timor, se pasta ne’e mai husi oratoriu ba tau hela iha oratorio, se pasta ne’e mai husi uma lisan tau hela ba iha uma lisan, se pasta ne’e mai husi organizasaun, tau hela ba iha organizasaun, imi ba hanesan Timor-oan fila imi nia an ba zero-zero atu simu Timo-oan iha Korea, ba imi nia moris, labele iha 77, ba fali ba fali empat belas iha ema nia rain, iha ne’e 22 ba fali 44 iha ema rai haluha tiha hirak ne’e,” dehan xefe gabinete SEFOPE, Jacinto Ribeiro Dias, ba jornalista sira iha salaun Timor Lodge, sexta (03/05).
Jacinto haktu’ir, traballador sira iha Korea hatete iha Timor treinu artemarsiais maibé iha Korea, China feto ida liki dala ida artemarsiais no rituais lakon hotu.
“Ha’u ba iha Korea semana rua tratamentu ba passaporte ba traballador sira labarik sira ida dehan ba ha’u hanesan ne’e, xefe gabinete, ita iha ne’eba treinu 22, ita iha ne’e treinu 77 mais mai iha ne’e China feto ida liki dala ida 77 sira ne’e lakon hotu kedas, ne’e hatudu katak saida, ita ba pur ezemplu ita ba buat ne’ebé labele halo labele halo, buat ne’ebé ita bele halo mak ita bele halo tanba iha ne’e ba halo saida, primeiru hanesan ohin ha’u nia liafuan rua ita nia nasaun ho kondisaun familia tanba ne’e mak ita ba la’os tanba sa’e ring,” Jacinto afirma.
Xefe Gabinete, husu ba traballador Timor-oan sira labele haluha familia sira tanba traballador sira ba servisu iha estranjeiru atu muda vida ekonomia pessoal no familia inklui reseita ba estadu.
“Imi ba tanba iha buat rua, nasaun nia nesesidade i familia nia nesesidade, atu responde buat rua ne’e iha perante imi nia esperansa iha Korea la’os tanba haree rai Korea, la’os tanba haree ema nia andar iha Korea hodi haluha ita nia uma ida hakdasak iha Timor maibé ba aprende saida mak iha Korea para sai ita nia misaun. Sai forsa ba ita nia futuru tanba ne’e imi la’os traballador maibe imi futuru empregador,” Nia husu.
Jacinto husu traballador sira atu labele haluha komprimisiu ne’ebé halo tanba traballador sira ba servisu iha Korea du Sul lori imajen Timor ba mundu.
“Imi nia ulun taka sapeu ho bandeira RDTL iha imi nia isin falun ho bandeira RDTL ne’e hatudu, imi timor i timor nafatin no fila-fali mai timor-oan nafatin, labele ohin timor aban timor semana oin ba tiha imi Korea tiha imi haluha timor labele ema dehan makan kacang lupa kulit, tanba imi ba ita ninia rai nia situasaun tanba ne’e kompriende, konsiente situasaun ne’e tau iha imi nia fuan lori ho imi nia pasta ba buka moris iha ema nia rai, mais ba la’os atu simu osan de’it, aprende, komprende, para hetan osan depois fila mai kuda osan hodi ku’u fali.
Repsentante Traballador Timor-oan, Guisipino Barreto, agradese tanba SEFOPE bele fo opurtunidade hodi ba servisu iha Korea.
“Hanesan traballador ami sente orgullu no agradese ba diretór SEFOPE, aproveita ho opurtunidade ida ne’e haruka ami ba Korea ho tempu ne’ebé badak no ami agradese tebes ho sira nia liafuan sai hanesan bukae ida mai ami durante tinan lima ne’ebé tasi haketak ami iha Korea no ami ida hanesan traballador, pessoal ha’u no hamutuk ho kolega sira promete katak ami sei la ses husi sistema ne’ebé kesi ona ami iha juramentu ida ne’e.
Jornalista : Nono
Editor : Loluwari
