Loluwari Média (Atauro) – Embaxadór Republika Indonésia ba Timor-Leste, Okto Dorinus Manik apresia xefe estadu Timor-Leste José Ramos-Horta no xefe governu Taur Matan Ruak realiza eventu festival múzika no Kultura iha Atauro.
Indonézia no Timor-Leste nu’udar viziñu ne’ebé iha relasaun kultural kuaze ladun diferente, liliu komunidade sira husi parte rejiaun Nusa Tenggara Timur (NTT) Indonésia mos hola parte iha eventu kultural ne’e hodi aprezenta sira nia knananuk tradisionál NTT.
“Ha’u hanoin ida ne’e nu’udar kolaborasaun ida ne’ebé diak tebes entre nasaun rua, no ida ne’e bele tulun nasaun rua atu explora diak liu tan pontensialidade sira ne’ebé iha liga ho setór turizmu, edukasaun no mós setór sira seluk,” dehan Embaxadór Indonésia ba Timor-Leste, Okto Dorinus Manik ba jornalista sira iha Maumeta, Atauro tersa (22/11).
Diplomata ne’e konfesa, Prezidente Republika iha antusiasmu no konsentrasaun bo’ot atu dezenvolve no explora setór potensial sira iha Timor-Leste.
Nia haktuir, iha fulan Jullu liu ba PR José Ramos-Horta hala’o mos vizita ba Labuan Bajo Indonésia no husi ne’eba haree katak TL no Indonésia liliu NTT iha tradisaun no kultura ne’ebé kuaze hanesan no mos potensialidade seluk ne’ebé estadu rua diskuti, atu haklean liu tan, hanoin ho apresiasaun hodi ajuda dezenvolvimentu setór turizmu.
PR Ramos-Horta esplika, ekipa ida husi Kupang, NTT hola parte mos iha festival múzika no Kultura Atauro, Indonésia nu’udar nasaun ida ho nia diversidade oioin, no kapas bainhira reprezentante husi Indonésia bele hola parte iha eventu ne’e.
“La’os de’it Festival Múzika no Kulturál Atauro, maibé ita hanoin ona atu iha atividade Tour de Timor ne’ebé sei hahu husi Kupang mai Dili ba Lautém no mai finaliza iha Dili, atividade sira ne’e bele atrai tan investidor sira husi nasaun seluk, mai TL,” PR afirma.
Partisipante NTT, Isu Inus Nony, sente orgullu tanba bele hola parte iha eventu festival kultural ne’ebé furak tebes.
“Extraordinária tebes partisipa iha Festival Múzika no Kulturál Atauro, sente haksolok bele mai fahe esperiensia ho Timor oan hotu liu husi atrasaun no muzika kultural.”
Ho eventu festival kultural ne’ebé realiza iha Atauro bele haklean no hametin amizade entre sidadaun sira husi NTT no TL.
“Ami hasolok partisipa iha Festival múzika no kultural Atauro, ami hein katak sei mai hikas iha festival Múzika no Kultura sira tu’ir mai atu kontinua hametin relasaun amizade.” Nony salienta.
Iis Kuriawan dehan, sira sente haksolok ho festival Múzika no Kultura Atauro no sente TL no Indonézia iha kultura ne’ebé kuaze hanesan liliu iha vestuariu, no ropa tradisionál sira.
“Ami hanoin katak festival Múzika no kultura ida ne’e sei fo espasu ba sidadaun sira nasaun rua nian hadomi liu tan muzika tradisional, no kultura nu’udar patrimóniu kultural husi beiala sira ba jerasaun foun,” nia deklara.
Entertantu grupu arte NTT apresenta dansa tradisionál rua mak sisi Klemuti no Sia Noni.
Jornalista : Chay Risky
Editór : Loluwari
