BMFKPTT Kontente Aprezenta Dansa Kultura Iha Festivál Fronteira 2023
Loluwari Media (Maliana) – koordenador grupu dansa kultura Malaka Vicky Seran, hatete, Grupu dansa kultura husi Nusa Tenggara Timur (NTT) ho Timor-Leste kontente partisipa Festival Fronteira 2023 durante loron haat komesa husi 15 to’o 19 novembru 2023.
“Ami husi suku rua ho sangar seribu budaya reprezenta munisipiu (kabupaten) Malaka, ami sente kontente tanba ami bele partisipa Festival Fronteira 2023 iha munisipiu Bobonaro durante loron haat no governu Timor-Leste ho nia povu simu ami ho atendimentu no fasilidade diak tebes hanesan simu ami husi Motain to’o fatin toba nune’e ami sente povu Timor-Leste respeita tebes ami hodi nune’e ami fo obrigadu barak tebes ba governu Timor-Leste liu-liu komunidade Maliana.” dehan koordenador grupu dansa kultura Malaka Vicky Sera ba jornalista iha resintu Ginasiu Maliana, sesta (16/11).
Koordenador grupu ne’e dehan, sira nia grupu dansa kultura Sangar Seribu Budaya ho ema nain 31 feto mane halo preparasaun durante fulan ida antes mai hatudu iha festival ida ne’e, dansa kultura sira hatudu mak istoria prinseja (putri kayangan) nain hitu mai haris iha rai, Taitalak/Gong no likurai.
“Ami husi sangar Barisan Muda Forum Komunikasi Pejuang Timor-Timur (BMFKPTT) iha Kupang, sente kontente tanba bele mai aprezenta dansa kultura iha Timor-Leste ami agradese ba komisaun organizadora konvida ami, ami nia preparasaun mai aprezenta dansa kultura durante fulan ida.”
Dansa kultura ohin sira hatudu ne’e nu’udar kombinasaun dansa kultura husi Timor-Leste ho Kupang, Rote, Sabu, sira mai partisipa festival ne’e la hetan difikuldade tanba sira hetan hahan diak, toba fatin diak no seguransa maximu husi protokolu no Polísia Nasionál Timor-Leste (PNTL).
Durante husi viajen to’o mai Maliana sira seidauk sente difikuldade tanba governu Timor-Leste no komunidade Maliana simu no respeita tebes sira, sira ba ne’ebe sempre hetan seguransa maximu husi protokolu no PNTL, liliu sira nia espetativa mai partisipa festival ne’e sira apresia governu Timor-Leste, hein katak festival bele lao susesu nune’e relasaun Timor-Leste ho NTT, Indonesia la’o diak.
Membru Sangar BMFKPTT Kupang Joana Ulfa Soares, hatete, sangar Barisan Muda Forum Komunikasi Pejuang Timor-Timur (BMFKPTT) iha Kupang sente kontente tanba bele mai aprezenta dansa kultura iha Timor-Leste, agradese ba komisaun organizadora.
Reprezentante sangar Timor Furak ho Lejiaval Dominica de Sousa informa, sente kontente tanba hetan konfiansa husi SEAC mai aprezenta dansa kultura iha Festival Fronteira (FF) 2023 reprezenta povu Timor-Leste no haree dansa kultura Timor Osidental.
“Ami sente kontente hetan konfiansa husi SEAC mai aprezenta dansa kultura iha FF 2023 reprezenta povu Timor-Leste no ami mos haree dansa kultura husi maluk sira Timor Osidental nian mak hanesan husi Belu, Kupang no Malaka.”
Dominica afirma, sira prepara dansa kultura durante fulan ida molok aprezenta iha festival ne’e hamutuk ho sangar dansa kultura sira seluk no hetan difikuldade transporte maibé hahan no toba fatin komisaun prepara.
Jornalista : Chay Risky
Editór : Loluwari
