Loluwari Media (Dili) Prezidente Republika, José Ramos-Horta iha loron natal (25/12) vizita vítima 54 husi insidente ‘ahi han’ meroadu Taibessi husu ba PNTL atu halo investigasaun ba motivu husi insidente ne’e.
Familia 54 ho membru atus haat resin mak hamaan-an iha Edifísiu Veteranu iha Taibessi, hafoin ahi-han Merkadu Taibessi iha Kinta-Feira 22 de Dezembru kalan.
“Ohin ha’u mai haré hanesan informal de’it, konfiansa Autoridade governu, Bombeirus, PNTL sira dau-daun ne’e halo ona investigasaun, tenki hatene loloos, tanba sá mak insendiu ne’e akontese? tanba provoka vítima, maibé ha’u kontente haré apoiu lalais kedas husi Prezidénsia, Prezidente Munisipiu, Sekretáriu Estadu protesaun sivil(SEPS),” Prezidente Republika (PR) José Ramos Horta hateten ba Jornalista sira iha Taibessi Dili, Tersa (22/1222).
Xefe Estadu husu mos ba Governu atu reabilita Merkadu Taibessi ho apoiu husi doadór balun, hodi bele konstrui merkadu moderna, iha seguransa no hijiene.
“Ha’u hanoin ba oin governu tenki haree didi’ak, halo merkadu ida boot liu tan karik, ho kondisaun di’ak liu tan, tanba ne’e ha’u hanoin hanesan prioridade ida Governu devia signifika ema rihun ba rihun sira-nia empregu sira-nia moris, ita tenki buka haré halo investimentu ida ba merkadu ida di’ak modernu ho kondisaun saude, fatin ne’e ita hateten ema lubuk ida mak hetan moris iha ne’e, sira La’ós dezempregadu,”PR Horta sublina.
iha fatin hanesan Sekretáriu Estadu Protesaun Sivil, Joaquim Gusmão hateten, koolabora ona ho Autoridade Munisipiu Díli hodi indentifika vítima sira nune’e bele distribui apoiu emerjénsia.
“Ita identifika família vendedores sira hamutuk 54, ho totál komunidade sira besik 500 mak iha ne’e, Protesaun Sivíl nia papél kuandu akontese dezastre tenki hetan kedas apoiu emerjénsia,Apoiu emerjénsia ne’e mak ai-han no la’os ai-han tasak,Iha kazu ida-ne’e ai-han tasak sei prepara husi Autoridade Munisípiu Díli ba ita-nia komunidade sira,”Joaquim esplika.
Tanba ne’e, sei la distribui materiál konstrusaun ba vítima sira, tanba merkadu Taibessi hanesan edifisiu publiku.
“Agora ita haree to’ok halo nusa mak bele ba oin, tanba merkadu ne’e Edifísiu públiku la’os rezidénsia, hanesan mós kazu iha Merkadu Comoro, Merkadu Manleuana no Merkadu Maubisse nian, ita labele fó apoiu material konstrusaun, tanba ida-ne’e ita entrega fila-fali ba jestaun merkadu mak sei hare,” Nia salienta.
Governu fo ona orás 72 ba vitima sira, atu buka hela fatin, vitima balun iha rezidénsia iha Díli no ezekutivu mos apela ba vendedor sira katak, merkadu hanesan Edifísiu públiku no labele hela permanente iha estabelesimentu laran.
Vizita Xefe Estadu ba merkadu Taibessi akompaña husi Prezidente Autoridade Munisípiu Díli, Dirijente husi Prezidente Autoridade Protesaun Sivíl no Segundu Komandante PNTL Munisípiu Díli.
Jornalista : Chay Risky
Editor : Loluwari
