Loluwari Média (Dili) – Komandu Jerál Polísia Nasionál Timor-Leste (PNTL), Komisariu Polísia, Henrique da Costa, hatete, PNTL sei halo rekrutamentu 200 ba publiku bazeia orsamentu jeral estadu.
“Ita sei halo rekrutamentu ba publiku tu’ir orsamentu ne’ebé ita iha, maibé molok ita halo rekrutamentu ami mos sei halo preparasaun ba komisaun rekrutamentu hodi halo regulamentu kona-ba dokumentus saida mak presija ami sei fo sai nune’e aplikante bele hatene lori nia dokumentus tu’ir regra ne’ebé publika.” dehan Komandu Jerál Polísia Nasionál Timor-Leste (PNTL), Komisariu Polísia, Henrique da Costa, ba jornalista sira iha Palasiu Prezidensiál Bairro-Pité, Dili, tersa (16/01).
Henrique esplika, rekrutamentu 200 ba tinan ne’e bazeia ba orsamentu ne’ebé PNTL iha. PNTL atu halo rekrutamentu liu 300 ba leten depende orsamentu.
“Ami sei halo preparasaun material nune’e halo prosesu rekrutamentu ne’e no ita nia ekipa remata hotu mak foin ita komunika ba Ministeriu Interior (MI) nune’e bele hetan aprovasaun nomos PNTL ho MI sei presija parseiru sira husi GNR hodi fo rekrutamentu tanba ita Timor ho Timor mak fo rekrutamentu ita sei deskunfia malu.”
“Bainhira atu loke rekrutamentu ba F-FDTL no PNTL ita nia jovens barak mak antusiasismu hakarak tama Polísia no Forsa maibé ami fo hatene katak atu tama PNTL no F-FDTL ne’e nia prosesu la’os buat bain-bain maibé liuhusi prosesu faze por faze.”
Rekrutamentu ne’e sei liu selesaun dokumentus, selesaun mediku nian no mos akademika nian tanba ne’e nia prosesu sei naruk, tanba bazeia ba prosesu sira ne’e ami sei hetan selesaun joven ne’ebé kualidade nune’e dedika sira nia an duni ba instituisaun PNTL tanba servisu PNTL ne’e sei hasoru risku ne’ebé bo’ot no barak maibé sira prontu simu ka la’e.
Tamba PNTL halo rekrutamentu 200 ne’e bazeia ba orsamentu ne’ebé iha tanba 200 bainhira liu ami sei halo formasaun espesifiku ho durasaun fulan 6 no ami sei prepara mos fatin ba sira nomos PNTL sei prepara mos estrutura ne’ebé diak hodi fo formasaun ba sira.
Jornalista : Chay Risky
Editór : Loluwari
