PNTL- POLRI deskuti prevensaun krime transnasionál iha liña Fronteira Terreste
Loluwari Media (Dili) Komandante Jeral PNTL Komisariu Polisia Faustino da Costa hateten,durante Timor-Leste ho POLRI Indonézia antes ne’e iha tinan 2015 estabese ona akordu kooperasaun, oinsa halo kombate no Prevensaun ba krime transnasionál iha Fronteira Terrestres.
Polisia Nasionál Timor-Leste (PNTL) ho Polisia Republika Indonezia (POLRI) realiza enkontru Kordenasaun hodi halo Prevensaun ba Krime transnasional iha lina fronteira terrestres.
“Ita hahú ohin halo enkontru ida ho ita nia maluk POLRI sira iha Atabua Nusa Tengara Timor (NTT) maibé ita la konsege implementa, iha enkontru kooperasaun ne’e parte rua hamosu pontu 11 hodi naran espiritu Atambua,” Komandante Jeral PNTL Komisariu Polisia Faustino da Costa hateten ba jornalista sira iha Pusat Budayan Indonézia, Caicoli sesta (09/12/22).
Komisariu ne’e salienta, depois enkontru PNTL no POLRI rasik la konsege implenta tan enkontru, tanba tuir akordu kooperasaun tinan ida relaiza iha Idonézi no tinan ida realiza iha Timor-Leste.
“Maibé ita la konsege implementa, tanba ita hasoru situasaun pandemia ho aktividade sira seluk, ohin ita hahú fali enkontru iha T-L atu haforsa parte kooperasaun ho komunikasaun oinsa ita bele kombate krime sira iha Fronteira Terrestres nian,”komandante Fautino sublina.
enkontru ida ne’e importante tebes,nune’e parte rua PNTL no POLRI bele servisu hamutuk hodi halo prevensaun kombate krimi sira ho karakter tránsnasionál sira iha Fronteira Terrestre.
“Ita hotu hatene situasaun iha Fronteira akontese dala barak dehan krime ordinariu ema halo movimentu illegal, ho enkontru ohin ita koalia mós kona-ba krime organizadu ne’ebé ita tenke antisipa agora,”Nia salienta.
Alende ne’e mos Kepala Kepolisian Daerah Nusa Tengara Timor (NTT), Irjen Pol. Johni Asadoma mos haktuir,nia mai ho nia komitiva realiza enkontru kordenada ho PNTL no Autoridade Polisia Judiál sira no Ministeriu Jutisa atu deskuti kona-ba oinsá halo prevensaun no kombate krimi iha Fronteira.
“Enkontru ida ne’e nu’udar enkontru dahuluk no ha’u konsidera imporntante tebes oinsá atu halo kordenasaun servisu, hodi fortalese relasaun entre PNTL em-espsiál POLDA NTT atu prevene krimi konvesionál no krimi transnasionál iha liña Fronteira Terrestre,”Nia hateten.
PNTL no POLRI rasik sei deskuti no rekomenda buat balun importante enkontru ne’e se bele realiza tinan tinan iha Timor-Leste, ba futuru PNTL no POLRI bele servisu hamutuk hodi troka informasaun halo investigasaun hamutuk, halo operasaun hamutuk iha liña Fronteira no kapasitasaun rekursu humanu.
“Liu-liu formasaun ba membru POLRI no PNTL ne’e importante atu kombate krimi transnasionál ita nian,POLRI no PNTL presiza iha koñesimentu kle’an, tanba krimi transnasionál ne’e nu’udar krimi organizadu ema ne’ebé envolve krimi ne’e matenek sira bele uza ho maneira oi-oin,” Nia akresenta.
Kona-ba implementasaun zona Governu T-L no Indonézia sei implementa merkadu livre iha Rejiaun Administrativu Espesiál Oe-cusse Ambeno (RAEOA) implementasaun laiha problema, POLRI no PNTL sei asegura hamutuk atividade ne’e iha liña Fronteira.
“Ha’u hanoin implemntasaun ida ne’e iha parte pozitivu mak atu hasa’e ekonómia Nasaun rua nia,maibé implementasaun ida mós iha impaktu negativu maka liu-liu atividade krimi konvesionál no krimi tránsnasionál sei mosu iha liña Fronteira,”Kepala Kepolisian Daerah Nusa Tengara Timor (NTT), Irjen Pol. Johni Asadoma dehan.
Ministru Justisa (MJ), Tiago Amaral, iha diskursu nia hateten, ohin loron nia hanesan Ministru Justisa no mós nu’udar Xefe Interpol Timor-Leste, haksolok tebes hodi hola parte iha reuniaun kordenasaun entre parte rua husi Indonesia no mós T-L hodi diskuti hamutuk kona-ba krime transnasionál iha fronteira Timor-Leste ho Indonezia.
Nasaun rua T-L ho Indonézia mos relasaun povu husi Nasaun rua no sai besik liu tán no metin liu tán, maibe krime ne’ebé involve mós oknum partikulár husi Nasaun rua nia iha Fronteira no hakat liu Fronteira mós akontese no sei akontese tan iha futuru mai, krime ida ne’ebé nia natureza mai ho komplezu hanesan krime Droga, krime trafiku Umanu, terorismu no seluk tán.
“Ha’u fiar no esparansa bo’ot maske Polisia Sintifika Investigasaun Kriminál (PSIC) ho departamentu Interpol sei nurak, maibe ami hatene katak ho servisu hamutuk no koperasaun diak ho Nasaun seluk, liu-liu ho Indonezia troka informasaun ba malu servisu hamutuk ba kombate krime transnasional nian,”nia hatutan.
Reuniaun kordenasaun ida ne’e, sei la para ba iha ne’e deit, maibe sei kontinuasaun nafatin iha futuru oin mai, hodi hametin liu tan relasaun servisu Polisia, iha parte investigasaun kriminal rai T-L ho Indonezia nian, Tanba ho kordenasaun diak mak sei hamosu rezultadu ida ne’ebé diak liu tan.
“Ikus mai hau nia mehi katak reuniaun ohin loron sei hatudu duni rezultadu ida pozitivu, atu nune’e relasaun Timor-Leste ho Indonezia nian, ne’ebé diak ona sei sai diak liu no metin liu tán ba futuru,”nia sublina.
Embaixadór Indonezia Iha Timor-Leste, Octo Dorinos Manik mos hateten, agradese ba Maromak ho nia grasa fo kbi’it mai hotu-hotu ohin iha ne’e hodi halibur hamutuk iha fatin ida ne’e.
“Ohin ita hamutuk iha fatin ida ne’e hodi halo kordenasaun no fahe informasaun ba malu, hodi halo seguransa iha Fronteira rai rua Indonezia ho Timor-Leste,” nia Katak.
koperasaun ho kordenasaun rai rua hodi halo seguransa kombate krime liu-liu krime transnasional no mos lao ilegal sira,enkontru kordenasaun T-L no POLRI ne’e hetan partisipasaun husi Autoridade Investigador sira hanesan PCIC, SNI, PNSIK Ministeriu Justisa, Embaixadór Indoneizia iha Timor-Leste, POLRES, Polres Kupang.
Jornalista :Chay Risky
Editor : Loluwari
